Panic va recover

Ko’p xatoliklar if err != nil bilan tekshiriladigan oddiy qiymat. Lekin ba’zan dastur davom eta olmaydi - slice chegarasidan chiqish, nil pointerni ochish, nolga bo’lish. Bunday holatda Go panic hosil qiladi: u odatiy oqimni to’xtatib, chaqiruv stegi bo’ylab ko’tariladi, yo’lda deferlarni ishga tushiradi va agar hech kim to’xtatmasa, dasturni crash qiladi.

Panic va uni tutish

recover - panic ni to’xtatadigan yagona vosita. Uning sharti bor: u faqat defer qilingan funksiya ichida ishlaydi, chunki panic ko’tarilayotganda aynan deferlar bajariladi.

package main
 
import "fmt"
 
func xavfli() {
	defer func() {
		if r := recover(); r != nil {
			fmt.Println("panic tutildi:", r)
		}
	}()
 
	panic("biror narsa buzildi")
}
 
func main() {
	fmt.Println("boshlandi")
	xavfli()
	fmt.Println("dastur davom etyapti") // recover tufayli bu ishlaydi
}

$ go run recover-basic.go
boshlandi
panic tutildi: biror narsa buzildi
dastur davom etyapti

Defer qilingan funksiya recover bilan panic’ni ushlab qoldi, shuning uchun dastur crash qilmadi. recover panic qiymatini qaytaradi; panic bo’lmasa nil qaytaradi.

Panic’ni error’ga aylantirish

Amaldagi eng foydali naqsh - kutubxona ichida panic yuz bersa, uni tutib oddiy error ga aylantirish. Buning uchun qaytariladigan error ni nomlangan qilib e’lon qilamiz va defer ichida recover bilan o’rnatamiz:

package main
 
import "fmt"
 
func xavfsizBolish(a, b int) (natija int, err error) {
	defer func() {
		if r := recover(); r != nil {
			err = fmt.Errorf("hisoblashda panic: %v", r)
		}
	}()
 
	natija = a / b // b nol bo'lsa panic
	return natija, nil
}
 
func main() {
	n, err := xavfsizBolish(10, 0)
	fmt.Println("natija:", n, "| err:", err)
}

$ go run panic-to-error.go
natija: 0 | err: hisoblashda panic: runtime error: integer divide by zero

10 / 0 panic hosil qildi, lekin defer uni ushlab err ga yozdi - funksiya crash o’rniga oddiy xatolik qaytardi. Bu naqsh HTTP serverlarda keng ishlatiladi: bitta so’rovdagi panic butun dasturni yiqitmasligi kerak.

Qachon panic, qachon error

Oddiy qoida: kutilgan xatolik uchun error, kutilmagan holat uchun panic. Foydalanuvchi noto’g’ri ma’lumot kiritdi, fayl topilmadi, tarmoq uzildi - bular hayotning odatiy holatlari, error qaytaring. Slice chegarasidan chiqish, nil pointer, ishga tushishda majburiy konfiguratsiya yo’qligi - bular dasturchining xatosi, panic o’rinli. Standart kutubxona ham shunday: panic kamdan-kam, faqat zarur bo’lganda.

Takeaway: panic ni faqat tuzatib bo’lmaydigan holatlar uchun ishlating; kerak bo’lsa defer + recover bilan uni error’ga aylantiring.

Manba / batafsil: Defer, Panic, and Recover (Go blog) , recover hujjati 

Shu bilan Go da xatoliklar bilan ishlashning to’liq manzarasini - qiymat falsafasidan panic/recover gacha - ko’rib chiqdik.