fmt

fmt — ekranga chiqarish, matnni formatlash (format) va o’qish uchun har kuni ishlatadigan asbobingiz. Nomi ham “format” so’zidan olingan.

Println va Printf

Println argumentlar orasiga bo’sh joy qo’yadi va oxiriga yangi qator qo’shib beradi. Printf esa verb’lar (% bilan boshlanadigan belgilar) orqali natijani aniq boshqarish imkonini beradi — lekin bu yerda \n ni o’zingiz qo’shasiz.

package main
 
import "fmt"
 
func main() {
    fmt.Println("Salom", "dunyo")
    fmt.Printf("Ism: %s, yosh: %d\n", "Ali", 27)
    fmt.Printf("Pi = %.2f\n", 3.14159)
}

$ go run print.go
Salom dunyo
Ism: Ali, yosh: 27
Pi = 3.14

Qisqasi: tez chiqarish kerak bo’lsa — Println, formatni aniq nazorat qilmoqchi bo’lsangiz — Printf.

Manba / batafsil: pkg.go.dev/fmt#Printf 

Verb’lar

Eng ko’p ishga tushadigan verb’lar shular: %v (standart ko’rinish), %+v (struct maydon (field) nomlari bilan), %#v (Go sintaksisidagi ko’rinish), %T (tur/type), %d (son), %s (string), %q (qo’shtirnoq ichida).

package main
 
import "fmt"
 
type Point struct{ X, Y int }
 
func main() {
    p := Point{1, 2}
    fmt.Printf("%v\n", p)   // {1 2}
    fmt.Printf("%+v\n", p)  // {X:1 Y:2}
    fmt.Printf("%#v\n", p)  // main.Point{X:1, Y:2}
    fmt.Printf("%T\n", p)   // main.Point
    fmt.Printf("%q\n", "salom") // "salom"
}

$ go run verbs.go
{1 2}
{X:1 Y:2}
main.Point{X:1, Y:2}
main.Point
"salom"

Qisqasi: debug paytida struct ichida nima borligini ko’rishning eng tez yo’li — %+v va %#v.

Manba / batafsil: pkg.go.dev/fmt (Printing) 

Sprintf va Fprintf

Sprintf hech narsani ekranga chiqarmaydi — formatlangan natijani string qilib qaytaradi. Fprintf esa istalgan io.Writer ga yozadi: fayl, os.Stderr, tarmoq — farqi yo’q. Aslini olganda Println ham ichida Fprintln(os.Stdout, ...) ni chaqiradi, xolos.

package main
 
import (
    "fmt"
    "os"
)
 
func main() {
    msg := fmt.Sprintf("Foydalanuvchi %s (ID: %d)", "abdurahmon27", 42)
    fmt.Println(msg)
    fmt.Fprintln(os.Stderr, "Bu xatolik oqimiga ketadi")
}

$ go run sprintf.go
Foydalanuvchi abdurahmon27 (ID: 42)
Bu xatolik oqimiga ketadi

Qisqasi: string yasash uchun Sprintf, xatolarni os.Stderr ga yo’naltirish uchun Fprintf.

Manba / batafsil: pkg.go.dev/fmt#Sprintf 

Scan — kiritishni o’qish

fmt.Scan standart kirishdan (stdin) qiymatlarni o’qiydi. Argumentlarni ko’rsatkich (pointer) qilib berish shart — funksiya o’qigan qiymatni o’sha o’zgaruvchilarga yozadi.

package main
 
import "fmt"
 
func main() {
    var name string
    var age int
    fmt.Print("Ism va yosh: ")
    fmt.Scan(&name, &age)
    fmt.Printf("Salom, %s! %d yoshdasiz.\n", name, age)
}

$ echo "Ali 27" | go run scan.go
Ism va yosh: Salom, Ali! 27 yoshdasiz.

Qisqasi: butun qatorni o’qimoqchi bo’lsangiz bufio.Scanner qulayroq (bu haqda keyingi bo’limlarda gaplashamiz).

Manba / batafsil: pkg.go.dev/fmt#Scan 

Keyingi qismda strings bilan matn ustida ishlashni ko’ramiz.