Context

context.Context — goroutine’larga “to’xta” signali va muddatni yetkazishning standart usuli. Uzoq davom etadigan operatsiyani (tarmoq so’rovi, DB so’rovi) bekor qilish yoki unga timeout qo’yish kerak bo’lganda ishlatiladi. Har bir context ctx.Done() orqali bir channel beradi; o’sha channel yopilsa — “to’xta” degani.

Odatda ildizdan boshlaymiz: context.Background(). Undan WithCancel, WithTimeout yoki WithValue bilan yangi, “hosila” context yasaymiz.

WithCancel - qo’lda to’xtatish

package main
 
import (
    "context"
    "fmt"
    "time"
)
 
func worker(ctx context.Context) {
    for {
        select {
        case <-ctx.Done(): // bekor qilindi
            fmt.Println("ishchi to'xtadi:", ctx.Err())
            return
        default:
            fmt.Println("ishlayapman...")
            time.Sleep(50 * time.Millisecond)
        }
    }
}
 
func main() {
    ctx, cancel := context.WithCancel(context.Background())
 
    go worker(ctx)
    time.Sleep(120 * time.Millisecond)
    cancel() // to'xtash signali
 
    time.Sleep(50 * time.Millisecond)
    fmt.Println("main tugadi")
}

$ go run cancel.go
ishlayapman...
ishlayapman...
ishlayapman...
ishchi to'xtadi: context canceled
main tugadi

cancel() chaqirilishi bilan ctx.Done() yopildi va goroutine select orqali darhol chiqib ketdi. cancel ni har doim chaqiring (odatda defer cancel()) — aks holda resurs oqib ketadi.

WithTimeout va WithValue

context.WithTimeout belgilangan vaqt o’tishi bilan context’ni o’zi bekor qiladi — timeout uchun eng ko’p ishlatiladigan usul. context.WithValue esa so’rov davomida biror ma’lumotni (masalan, request ID) olib yuradi:

package main
 
import (
    "context"
    "fmt"
    "time"
)
 
func main() {
    ctx, cancel := context.WithTimeout(context.Background(), 100*time.Millisecond)
    defer cancel()
 
    ctx = context.WithValue(ctx, "reqID", "abc-123")
 
    select {
    case <-time.After(300 * time.Millisecond): // sekin ish
        fmt.Println("ish tugadi")
    case <-ctx.Done():
        fmt.Println("reqID:", ctx.Value("reqID"))
        fmt.Println("bekor qilindi:", ctx.Err())
    }
}

$ go run timeout.go
reqID: abc-123
bekor qilindi: context deadline exceeded

Ishga 300ms kerak edi, context esa 100ms da o’zini bekor qildi — ctx.Err() bunday holatda sababni (deadline exceeded) qaytaradi. Context har doim funksiyaning birinchi argumenti bo’ladi: func Do(ctx context.Context, ...). WithValue ni faqat so’rov doirasidagi metama’lumot uchun ishlating, oddiy parametrlarni uzatish uchun emas.

Qisqasi: context bekor qilish va muddatni goroutine’lar bo’ylab tarqatadi; ctx.Done() ni kuzating, cancel() ni defer bilan chaqiring.

Manba / batafsil: pkg.go.dev/context , go.dev/blog/context 

Endi shu asboblarni birlashtirib, amaliy naqsh — worker pool’ni quramiz.