Paketlar

Go da har bir fayl biror paketga tegishli. Paket - bir-biriga bog’liq kodni birlashtiruvchi eng kichik birlik. Modul paketlardan, paket esa fayllardan tashkil topadi.

Package clause

Har bir .go faylining birinchi (izohlardan keyingi) qatori - package e’loni. U faylning qaysi paketga tegishli ekanini aytadi. Qat’iy qoida: bitta papkadagi barcha fayllar bitta paket nomiga ega bo’lishi shart.

package matn
 
import "strings"
 
func Katta(s string) string  { return strings.ToUpper(s) }
func Kichik(s string) string { return strings.ToLower(s) }

Bir papkada ikki xil paket nomi bo’lsa, kompilyator darrov shikoyat qiladi:

$ go build ./matn
found packages matn (matn.go) and boshqa (kichik.go) in /home/user/loyiha/matn

Xulosa: papka = paket; ichidagi hamma fayl bir xil package nomini yozadi.

package main va kutubxona

package main - ishga tushuvchi dastur; ichida main funksiyasi bo’lishi shart, dastur shundan boshlanadi. go build uni bajariluvchi faylga (binary) aylantiradi. Nomi main dan boshqa har qanday paket - kutubxona: o’zicha ishlamaydi, uni boshqalar import qiladi.

package main
 
import (
	"fmt"
 
	"example.com/loyiha/matn"
)
 
func main() {
	fmt.Println(matn.Katta("salom"))
}

$ go run .
SALOM

Xulosa: main - dastur, qolgani - import qilinadigan kutubxona.

Paket izohlari

Yaxshi paket boshida uni tushuntiruvchi izoh turadi - u package qatoridan bevosita oldin yoziladi va go doc hamda pkg.go.dev  da hujjat sifatida chiqadi:

// Package matn matnlar ustida oddiy amallarni bajaradi.
package matn

Odat bo’yicha izoh “Package nomi …” deb boshlanadi. Har bir paketda bitta shunday izoh yetarli.

Manba / batafsil: Go spetsifikatsiyasi - Packages  va Effective Go - Names 

Endi paketning qaysi qismi tashqariga ko’rinishini - eksport qoidalarini ko’ramiz.